Չորեքշաբթի, 18 Հոկտեմբերի, 2017

Ես չեմ զարմանա, եթե աջ կողմում սիրտ ունեցող մարդկանց ստիպեն փոխել սրտի տեղը, իսկ ձախլիկներին՝ գրել աջ ձեռքով

Lragir.am
Ներքին կյանք - Հինգշաբթի, 12 Հոկտեմբերի 2017, 15:38


Աջ ղեկով ավտոմեքենաների վերաբերյալ մեջ եմ բերում տրանսպորտի նախարարության հայտարարությունը. «Հաշվի առնելով վաղաժամ, երբեմն հակասական փաստարկները` հարկ ենք համարում պարզաբանել, որ այս պահին աջակողմյան ղեկով տրանսպորտային միջոցների շահագործումը դադարեցնելու, դրանց սեփականատերերի համար պայմաններ սահմանող կամ նրանց իրավունքները սահմանափակող որևէ իրավական ակտ չկա»:

Խնդրում եմ նորից կարդալ մեջբերման “այս պահին” երկու բառը, և կհասկանաք, թե ինչպես այդ նախարարությունը միանգամից հազարավոր մարդկանց արդեն իսկ պատճառեց հսկայական նյութական վնաս և հոգեկան մտատանջություն: Հիմա աջ ղեկով ավտոմեքենա ունեցողները և նաև նրանց ընտանիքի անդամները այլևս զրկված են անհրաժեշտության դեպքում ավտոմեքենան վաճառելուց և սպասում են, թե երբ է այդ պահը գալու:

Հայաստանում աջ ղեկով ավտոմեքենաներ հայտնվեցին մոտ 50 տարի առաջ: Ես հիշում եմ, երբ առաջին անգամ ճանապարհային ոստիկանը տեսավ աջ ղեկը ավտոմեքենայի մեջ, զարմացած ասաց. “ամեն թիթիզություն տեսել էի, բացի սրանից”:

Ղեկը փոխելու հարց պիտի բարձրացներ Ճանապարհային ոստիկանությունը, հիմնվելով ծանրակշիռ փաստարկների վրա: Եթե չի եղել նման բան, ապա տրանսպորտի նախարարություն պետք է փակի հարցը ու ներողություն խնդրի այն մարդկանցից, ովքեր այսօր կորցրել են քունը:

Հիմա եթե նույնիսկ ճանապարհային ոստիկանությունը բերի փաստարկներ ու նման հարց բարձրացնի, ինչպես ասում են՝ պատվերը «կզռռա»:

Իմ խորհուրդը տրանսպորտի նախարարությանը` երբեք, կրկնում եմ՝ երբեք մի ասեք, թե այս հարցով զբաղվում եք, մտահոգված լինելով ժողովրդի անվտանգության ապահովմամբ: Այլապես կնմանվեք առողջապահության նախարարությանը, որ ասում է, թե ծխախոտը պետք է թանկացնել, որ մարդիկ քիչ ծխեն ու ուշ հիվանդանան: Ես չեմ զարմանա, որ նման մտածելակերպով և տրանսպորտի նախարարությանը հետեւելով, առոջապահության նախարարությունը օրենք մշակի՝ աջ կողմում սիրտ ունեցող մարդկանց ստիպելու փոխել սրտի տեղը, իսկ ձախլիկներին՝ գրել միայն աջ ձեռքով:

Աջ ղեկով ավտոմեքենայի վարորդ, ձախլիկ Առնոս Հովհաննիսյան

© 2005 - 2016 Բոլոր իրավունքները պաշտպանված են ՀՀ օրենսդրությամբ:
© 2005 - 2016 Մտահղացումը եւ ձեւավորումը Saratikyan.com